 |
Ich bèn Henk Ermans, gebaore (17 mei 1972) en getaoge in Zitterd, mit auwesj van Euverhaove. Wie dat dèkser geit höb ich mien leiveke gevònje en höb v’r twee poete om oos haer die al bekans op eige bein kènne gaon sjtaon. Daodoor woon en wirk ich òngertössje al gans gét jaore in Mesjtreich; mér ’t blout krup toch altied woo ’t niet gaon kènt en blif tóch altied sjtruime veur Zitterd allein! Mien hobbies zeen zènge (bie Vocal Harmony in Mesjtreich), wanjele (mit en zònger hòndj), laeze, puzzele, gezèlsjapsjpélkes, fotografeiere en natuurlik toneelsjpele. Vruiger reigelde en sjpeelde ich al toneelsjtökskes oppe basissjool in de Bandert. Daonao is ’t toneel-laeve e bietje sjtil gevalle, mér mit de drama-lesse oppe leraare-opleiding begoosj ’t weier te kriebele. Ich höb twéllef jaor veur en achter de sjérme mitgewirk aan het sjoolcabaret van ’t Stella Maris College, woo ich gewirk höb es leraar wiskunde. Wiejer höb ich e jaor of drie mitgesjpeeld mit toneelvereiniging D’n Uulesjpegel in Ulesjtraote, mér die klup is jaomer genòg opgehauwte te besjtaon. Vanaaf december 2022 gaon ich dus mitrepeteiere mit Toneelclub Euverhaove. De kènnismaking mit de gròp waor wérm en wèlkom: ’n gezèllige kliek mit väol sjaele kal! Toneel is ’n heerlike oetlaotklép wooste éns gans eemesj angesjters kèns waere, zònger dich te houve sjaame. Ich houp dan ouch dat ich ein sjoon biedraag kèn leevere! |
